Seinast dagført: 01-01-2017

8.5.1.3 Opnir eldstaðir, afturlatnir eldstaðir, konglaovnar og innbygdir ovnar

Stk. 1Áseting

Gólvið undir og uttan um opnar- og afturlatnar eldstaðir (peisir og brenniovnar), konglaovnar (pillebrændeovne) og innbygdar ovnar (masse­ovne) skal vera úr tilfari, ið ikki kann brenna, ella vera lagt á við tilfari, ið ikki kann brenna, soleiðis at forðað verður fyri, at neistar seta eld í.

(8.5.1.3, stk. 1)Vegleiðing

Ásetingin kann t.d. lúkast við, at tilfarið, sum ikki kann brenna, røkkur í minsta lagi 300 mm fram um afturlatnan eldstað (brenniovn) og í minsta lagi 500 mm fram um opnan eldstað (peis).Tilfarið, ið ikki kann brenna, eigur harumframt at røkka í minsta lagi 150 mm útum báðumegin við opið á eld­staðnum og í minsta lagi 150 mm aftur um framsíðuna á eldstaðnum.

Viðvíkjandi frástøðu til tilfar, ið kann brenna, verður víst til kap. 8.1.

Stk. 2Áseting

Afturlatnir eldstaðir (brenniovnar) kunnu hava roykspjell at stilla við hond, sum afturlatin tryggja eina fría gjøgnumráksvídd á í minsta lagi 20 cm².

Stk. 3Áseting

Vatntangar í opnum og afturlatnum eldstøðum (peisum og brenniovnum) mugu ikki bindast í tættan miðstøðuhitaútbúnað. Hetta er tó ikki galdandi, um trygdarventilur verður settur á hvønn ketil sær (hitagevandi eind).

(8.5.1.3, stk. 3)Vegleiðing

Við tættan miðstøðuhitaútbúnað skilst útbúnaður við trygdarventilum og íbundnum trýstvíðkanartanga.

Forboðið ímóti at binda í tættan miðstøðu-hitaútbúnað kemst av, at brenning í opnum og afturlatnum eldstøðum (peisum og brenni-ovnum) ikki verður stýrd sjálvvirkandi sum í afturlatnum eldstøðum (brenniovnum), kyndir við olju ella gassi.

Tí er vandi fyri ovhiting við jøvnum millumbilum og harvið fyri spreinging í útbúnaðinum.

Viðvíkjandi trygdarventili á ketlum kann vísast til donsku vegleiðingina “B.4.8 Indretning og ­anvendelse af fyrede varmtvandsanlæg”.

Stk. 4Áseting

Opnir og afturlatnir eldstaðir (peisir og brenni­ovnar) mugu ikki bindast í roykrør frá gass­kyndum ella oljukyndum brenniútbúnaði, sum lúka krøvini í kap. 8.5.1.4, stk. 2 og heldur ikki í roykrørskipanir, har ketlar eru íbundnir, sum eru skipaðir til yvirtrýstbrenning.

Úrslit: