Sambýlið í Birtulíð

Landsverk bjóðar vegna Almanna- og bústaðamálaráðið út byggingina av nýggjum sambýli í Miðvági í heildararbeiðstøku. Sambýlið fer at kallast Sambýlið í Birtulíð og er til virksemi hjá Almannaverkinum.

Verkætlanin fevnir um prosjektering og bygging av einum sambýli við 12 íbúðum, býttar í tvær búeindir við seks íbúðum í hvørjari eind. Umframt íbúðirnar fevnir byggingin um felagsøki, starvsfólkaøki og uttanumøki.

Sambýlið skal skapa tryggar, heimligar og virðiligar karmar fyri gerandislívið hjá fólki við sálarligum og sosialum avbjóðingum. Dentur verður lagdur á at skapa eitt varandi heimi við góðum karmum fyri bæði privatlívi og sosialum felagsskapi. Samstundis verður dentur lagdur á haldgóðar og varandi loysnir, sum eru rakstrarvinarligar og fíggjarliga skynsamar.