VERKÆTLAN: Fríggjadagin í farnu viku varð prosjekteringin av eini nýggjari hvalbiarfarleið boðin út. Tunnilin, sum verður um 2.050 metrar til longdar, verður úr dalinum í Trongisvági til dalin sunnan fyri Nes í Hvalba. Somuleiðis skulu tilsamans 5,6 kilometrar av tilkoyringarvegum gerast, har talan bæði verður um at gera nýggjar vegir, eins og at dagføra verandi vegir, sum verða partar av verkætlanini.

OPIÐ HÚS: Eins og fleiri onnur arbeiðspláss í býnum letur Landsverk dyrnar upp undir Mentanarnáttini fríggjakvøldið 3. juni. Øll eru væl komin at vitja stovnin og fáa ein kaffimunn millum klokkan 20 og 22, har framsýning er sett upp av størstu verkætlanunum undir landinum, sum eru í gerð í løtuni. Eisini verður høvi at síggja høvuðsskrivstovuna hjá stovninum.

ÍLØGUR: Í nýggjastu ársfrágreiðingini hjá Landsverki peikar stjórin á stovninum á stóra tørvin á viðlíkahaldi av infrakervinum og almennum bygningum undir landinum umframt á møguligar loysnir, ið kunnu betra um støðuna. Eftirsleipið er nú so stórt, at tað mugu finnast alternativar loysnir, tí árliga játtanin á fíggjarlógini megnar ikki at fylgja við viðlíkahaldstørvinum.

STARVSFÓLK: Frá 1. juni at rokna fer Heini Eysturoy frá sum leiðari á Deildini fyri Infrakervi á Landsverki. Til nýggjur leiðari er settur, fara Armgarð E. Steinhólm, leiðari fyri planeindina, og Mikkel H. Frandsen, leiðari fyri rakstrareindina, at leiða Deildina fyri Infrakervi í felag.

VERKÆTLAN: Fyri góðum tveimum vikum síðani varð punktum sett fyri byggingini av 12 vardum íbúðum í Runavík, nevnt Sambýlið á Blikagøtu. Í hesum sambandi varð skipað fyri almennari móttøku í heiminum, har nógv fólk vóru komin saman at hátíðarhalda dagin saman við íbúgvum, starvsfólki og øðrum, sum eru knýtt at verkætlanini.

VERKÆTLAN: Nú er komið so mikið langt við fyrireikingunum til útbyggingina av Landssjúkrahúsinum, at Landsverk lýsir eftir arbeiðstakarum til undangóðkenning í sambandi við stóru verkætlanina.

RÁÐSTEVNA: Fyri góðari viku síðani helt Norðurlendska Vegasambandið ráðstevnu í Føroyum við 30 føroyskum luttakarum, og fyrilestrarhaldarum úr Íslandi, Føroyum, Noregi, Svøríki og Danmark. Evnið hesaferð var ferðslutrygd.

STARV: Landsverk hevur í dag sett Armgarð E. Steinhólm í starv sum deildarleiðara fyri Infrakervi.