Grundarlagið framvegis burtur.
Stígurin í samfelagsbúskapinum og minkaða virksemið í byggivinnuni hevur av álvara havt ávirkan á tann partin av Landsverki, sum framleiðir skerv og grót til byggivinnuna. Hagtølini yvir framleiðsluna av gróti og skervi vísa, hvussu álvarsom støðan er.

Orsøkin til uppsagnirnar í grótbrotinum í Porkeri var og er tí eisini framhaldandi vantandi grundarlag fyri føstum størvum.

Asfaltframleiðslan hjá Landsverki er so nógv skerd, at grundarlag er ikki fyri at hava so nógv fólk í føstum størvum í grótbrotinum longur.

Broyttu umstøðurnar gjørdu tað neyðugt at umskipa alt virksemið í Suðuroy. Hetta hevur havt við sær eitt tættari samstarv millum arbeiðseindirnar í oynni – grótbrotið í Porkeri, smiðjuna í Øravík og veghaldið. Í dag eru tað tí verandi starvsfólk hjá Landsverki í Suðuroy, sum avgreiða teir ordrar, ið nú eru í grótbrotinum.

Føroya Arbeiðarafelag vísir ónøgd
Føroya Arbeiðarafelag hevur víst sína ónøgd við uppsagnirnar í grótbrotinum í Porkeri og hevur boðað frá, at tey frá í dag 17. august blokera grótbrotið. Samband er millum partarnar um málið.