Sunnumorgunin tann 6. desember var aftur ein eldsløkkjari tikin úr einum av neyðskápunum í einum tunli hjá Landsverki. Hesaferð gekk tað út yvir Hovstunnilin. Málið er meldað til løgregluna.
Hetta er sera óheppið og álvarsamt, og heitir Landsverk staðiliga á fólk at lata trygdarútgerðina í tunlunum fáa frið. Trygdarútbúnaðurin er fyri trygdina hjá tí einstaka, ið koyrir ígjøgnum tunlarnar. Heitt verður somuleiðis á fólk, ið kunnu koma við upplýsingum um tilburðin, at siga Landsverki frá.