Lýsing

Endamálið við verkætlanini er at bøta umstøðurnar á verandi vegi til Dals. Vegurin liggur í brattlendi, og fleiri staðni ryður grót oman á vegin. Á einum teini á umleið 500 metrar er eisini ryðið undan vegnum.

Støðan

mai 2019

Tann 16. mai var hakin settur í fyri nýggju farleiðini til Dals. Tað var landsstýrismaðurin í samferðslumálum, Heðin Mortensen, ið loysti fyrsta flagið av fyri nýggja vegnum til tunnilsmunnan húsavíkarmegin. Almenna tiltakið savnaði um hálvtannaðhundrað fólk á Húsavíkarvegnum, har nýggi vegurin til tunnilsmunnan eftir ætlan skal byrja. Arbeiðið fer at byrja beinanvegin. Fyrst verður økið hegnað av, og maskinurnar verða fluttar suður. Arbeiðsvegurin til tunnilsmunnan verður gjørdur fyrst, áðrenn byrjað verður at bora sjálvan tunnilin.

mars 2018

Í 2018 eru settar 1,0 mió. krónur av á Løgtingsins fíggjarlóg til farleiðina til Dals. Ístaðin fyri at nýta peningin til ábøtur á verandi farleið, sum ikki kunnu væntast at gera nakran avgjørdan mun har, verður hesin peningur nýttur til at fyrireika eina nýggja farleið við tunli úr Húsavík til Dals. Talan verður um ein tunnil, sum verður umleið 2.000 metrar langur.

desember 2017

Í oktober varð ein stórur steinur í brattlendinum oman fyri vegin ígjøgnum Dalslíð sprongdur burtur. Orsøkin var vandin fyri, at steinurin kundi loysna og ríða oman á vegin. Til tess at tryggja og verja sjálvan vegin, áðrenn sprongt varð, løgdu fólk frá Landsverki stálplátur út á umleið 25 metrar framvið spreingistaðnum.
Tíðindaskriv um spreingingina kann lesast á hesi leinkju:
http://www.landsverk.fo/fo-fo/spreingja-storan-stein-i-dalsli%C3%B0-burtur

juni 2017

Ætlanin var at bøta um tann partin av teininum fyrst, har tað ryður undan vegnum, men nærri kanningar vístu at meira átrokandi er at tryggja fyri gróti oman fyri vegin. Innan stutta tíð verður neyðugt at játta 6,0 mió. krónur yvir eitt ella tvey ár fyri at bøta um vegateinin, har tað ryður undan vegnum.

Fakta

Bygningsánari: Samferðslumálaráðið

Byggiharri: Landsverk

Høvuðsráðgevi: Ikki avgjørt

Arbeiðstakarar: Ikki avgjørt

Tíðarætlan: Í 2017 verður tryggjað fyri ímóti gróti oman fyri vegin.

Kostnaðarætlan: Játtanin í 2017 er 1,0 mió. krónur, sum verður nýtt til at tryggja fyri gróti oman fyri vegin, umframt at gera eina kanning av berievninum í vegnum. At bøta um allan vegateinin er mett at kosta umleið 6,0 mió. krónur.

factimg
Úrslit: