Atgongd frá arbeiðs- og tilhaldsrúmi til vesirúm skal vera gjøgnum forrúm.
Forrúm kann vera felags fyri fleiri vesirúm.
Talið av vesum skal lagast til talið av starvsfólkum.
Kravið kann lúkast við innrætting av í minsta lagi einum vesi fyri hvørji 15 starvsfólk. Eru standikummur til mannfólk, kann talið av vesum minkast til eitt fyri hvørji 20 starvsfólk. Talið av standikummum eigur í tílíkum førum at vera í minsta lagi ein fyri hvønn 20. mann.
Serstøk vesi skulu vera til ávikavist mannfólk og konufólk uttan so, at hvørt einstakt vesi er í einum sjálvstøðugum rúmi við forrúmi uttan standikummur.
Vesirúm ella forrúm til vesi skulu hava hondvask.
Í skrivstovu- og fyrisitingarbygningum skal, á teimum hæddum har sum vesirúm eru innrættað, í minsta lagi eitt teirra lúka krøvini í kap. 3.4.1, stk. 5.
Víst verður til tekningar í kap. 3.4.1, stk. 5.
Við umbygging skal vesirúm, sum er fevnt av stk. 4, innrættast soleiðis, at tað kann nýtast av persónum í koyristóli. Í minsta lagi eitt vesirúm til fólk í koyristóli skal innrættast í atkomuhæddini ella í aðrari hædd, sum hevur atgongd umvegis lyftu o.tíl.